Fiadh-bheatha

Tha Pàirc Nàiseanta a’ Mhonaidh Ruaidh na àite air leth airson nàdar. ’S fhiach comharrachadh gu bheil e mar dhachaigh do 25% de na gnèithean as teirce agus sa chunnart as motha san Rìoghachd Aonaichte. Tha eòin, mamalan, èisg agus neo-dhruim-altachain uile beò san aon àrainneachd, bho shlèibhtean as àirde air àrd-chlàr a’ Mhonaidh Ruaidh sìos gu talamh an tuathanachais, na lochan agus aibhnichean nan srathan.

Eòin

Tha caochladh anabarrach de ghnèithean eòin a’ fuireach an seo. Tha iolairean a’ neadachadh shuas air a’ mhonadh, agus chithear eòin an t-sneachda, amadain mhòintich agus tàrmachanan sna h-àrainnean letheach-tundra. As t-earrach, bidh srathan Bhàideanach agus Srath Spè a’ toirt taic do aon de na h-àireamhan as motha de dh’eòin-grunnachaidh a tha a’ briodadh, a’ gabhail a-steach curracagan, gillean-Brìde, naoisg agus guilbnich. Tha na coilltean mar dhachaigh don cam-ghob, a tha air leth do dh’Alba, capaill-choille, cailleachagan cìreach agus coilich-choille, fhad ’s a bhios lachan a’ chinn uaine agus iolairean-uisge a’ tàthaich nan lochan.

Mamalan

Chan urrainnear measadh fo luach an tlachd a gheibhear à bhith a’ faicinn feòragan-ruadh a’ ruith suas craobh aon às dèidh a chèile no faicinn aon dòbhran màlda air bruach na h-aibhne, no a’ cluinntinn beucadh nan damh agus iad a’ bùireadh. Chan eil e gu diofar cia mheud turas a tha thu air a bhith fortanach amharc air na creutairean suaicheanta seo, tha e an-còmhnaidh aoibhinn a bhith a’ faicinn nam mamalan seo a’ soirbheachadh san àrainn nàdarra aca fhèin. Chaidh bìobhairean agus cait-fhiadhaich ath-thilleadh don sgìre ann an 2023, a’ cur ris an àireamh de mhamalan eadar-mheasgte, a tha cuideachd a’ gabhail a-steach geàrran a’ mhonaidh, taghain agus fèidh ruadha agus earban-ruadha.

Neo-dhruim-altachain

Is tric gum bithear a’ dèanamh dearmad air na creutairean nas lugha nach eil cho bog-mholach - na neo-dhruim-altachain - ach a gheibhear cuideachd sa Phàirc Nàiseanta. Ach ’s e an sgìre aon de na prìomh thèarmainn airson feadhainn de na meanbh-fhrìdean as teirce san Rìoghachd Aonaichte, a’ gabhail a-steach diofar leòmannan prìseil, cruinneag a’ chinn a tuath, seillean-ruamhair beag sgreabach agus seanganan sònraichte. Tha neo-dhruim-altachain mar phrìomh fhòcas airson na h-obrach glèidhteachais againn.