Tha Pàirc Nàiseanta a’ Mhonaidh Ruaidh beartach ann an dualchas cultarail, agus tha a’ Ghàidhlig na pàirt chudromach dheth — bha làmh an uachdair aig a’ chànan aon uair, agus tha sin fhathast follaiseach an-diugh sna h-ainmean-àite a chì sinn sa Phàirc. A-nis, tha Ùghdarras Pàirc Nàiseanta a’ Mhonaidh Ruaidh ag iarraidh ur beachdan air mar a bu chòir dhaibh mar bhuidheann a’ Ghàidhlig a chleachdadh agus a leasachadh san obair làitheil aca.

Tha a h-uile buidheann san raon phoblach ann an Alba fo dhleastanas Plana Gàidhlig ullachadh. Tha seo gus dèanamh cinnteach gu bheil a h-uile duine a’ cluiche a phàirt ann an cruthachadh àm-ri-teachd a tha seasmhach airson na Gàidhlig ann an Alba.

Tha an treas Plana Gàidhlig aig Ùghdarras Pàirc Nàiseanta a’ Mhonaidh Ruaidh a-nis a-mach airson co-chomhairleachadh agus thathar ag iarraidh air a’ phoball agus air buidhnean aig a bheil ùidh sa chùis sùil a thoirt air an sgrìobhainn agus beachdan a chur a steach ma deidhinn. Tha am Plana Gàidhlig a’ cur an cèill mar a bhios Ùghdarras a’ Phàirc a’ cleachdadh agus a’ leasachadh na Gàidhlig san obair làitheil aca agus mar a bhios a’ bhuidheann a’ comasachadh agus a’ brosnachadh cleachdadh na Gàidhlig ann an conaltradh leis a’ phoball agus le prìomh chom-pàirtichean. Tha seo a’ gabhail a-steach raointean obrach leithid chonaltraidhean air-loidhne, dearbh-aithne fhaicsinneach Ùghdarras a’ Phàirc, agus taic airson phròiseactan co-cheangailte sa Phàirc, a bharrachd air margaideachd agus trèanadh luchd-obrach.

Thuirt Cathraiche Bòrd Ùghdarras a’ Phàirc, Sandy Bremner: “Tha Pàirc a’ Mhonaidh Ruaidh na sgìre a tha moiteil, mar bu chòir, às an iomadachd chultaraich is cànanaich a th’ aige. Tha a’ Ghàidhlig, ge-tà, gu h-àraid cudromach, gu sònraichte nuair a tha thu a’ smaointinn air mar a tha an cànan ag ath-fhuaimneachadh air feadh na sgìre, mar eisimpleir tro ainmean nan cnoc far as toigh leinn streap, na h-aibhnichean far as toigh leinn iasgach no ainmean nam bailtean beaga sa bheil sinn a’ fuireach.

“Mar bhuidheann, tha sinn toilichte a’ phàirt againne a chluiche gus dèanamh cinnteach à àm-ri-teachd a tha beòthail don Ghàidhlig. Tha i glè chudromach gu h-eachdraidheil agus gu cultarach don Phàirc – agus dhaibhsan a tha a’ fuireach ann no a’ tadhal air – agus, mar sin, nach gabh sibh an cothrom fios air ais a chur thugainn.”

Tha an co-chomhairleachadh poblach air Plana Gàidhlig Ùghdarras a’ Phàirc Nàiseanta, a mhaireas sia seachdainean, a’ tòiseachadh an t-seachdain sa agus bidh e a’ ruith gus 7 Màrt. Faodar an sgrìobhainn fhaicinn agus beachdan a chur a-steach air tro làrach-lìn Ùghdarras a’ Phàirc

Air neo, faodar a leughadh aig oifisean Ùghdarras a’ Phàirc ann am Baile nan Granndach.

Gaelic / Gàidhlig – Cairngorms National Park Authority