Thathar a’ toirt cuireadh do dhaoine a tha a’ fuireach ann am Pàirc Nàiseanta a’ Mhonaidh Ruaidh agus aig a bheil dealas airson na pàirce a bhith a’ dealbhan maoin coimhearsnachd brosnachail ùr luach £1 millean. 

Tha Maoin Choimhearsnachdan ùr a’ Mhonaidh Ruaidh 2030 a’ tasgadh ann an coimhearsnachdan –  ann an dòigh eadar-dhealaichte. Am-bliadhna, chan e a-mhàin gum bi cothrom aig coimhearsnachdan iarrtas a dhèanamh airson airgid, ach dealbhaidh iad am pròiseas gu lèir bho thoiseach gu crìch gus £1 millean a thoirt seachad.

Anns a’ Ghearran, thèid pannal pàighte de dhaoine le ùidh mhòr sa Phàirc Nàiseanta fhastadh gus a’ mhaoin a dhealbhadh bhon fhìor thoiseach agus gus co-dhùnadh ciamar a bu chòir dha obrachadh. Nì am pannal seo na co-dhùnaidhean cudromach uile mun mhaoin, bho shlatan-tomhais airson ion-roghnachd gu na suimeannan as àirde de dhuaisean a thèid a thoirt seachad agus mar a thèid an t-airgead a sgaoileadh. Tha Ùghdarras na Pàirce a’ sireadh 18 daoine a tha a’ riochdachadh farsaingeachd de dh’ùidhean coimhearsnachd airson ballrachd air a’ phannal agus tha tagraidhean a’ fosgladh an-diugh.

Bheir a’ charthannas neo-eisimeileach Involve Foundation taic dhan bhuidhinn gus beachdan a chruthachadh agus gus co-dhùnaidhean a dhèanamh air mar a bhios pròiseas nan tabhartasan ag obair. Tachraidh seo anns a’ chiad leth de 2026, leis an dùil gun tèid a’ mhaoin a chur air bhog as t-samhradh 2026.

Thuirt Sandy Bremner, Neach-gairm Ùghdarras Pàirc Nàiseanta a’ Mhonaidh Ruaidh: “Tha a’ mhaoin bhrosnachail ùr seo a rèir prìomh amas prògram a’ Mhonaidh Ruaidh 2030 – cumhachd a thoirt do dhaoine gus a bhith a’ coimhead às dèidh an àite shònraichte seo do ghinealaichean ri teachd.”

“Tha tòrr mòr àrd-amasachd agus spionnadh an seo sa Phàirc Nàiseanta, gu h-àraidh a thaobh a bhith a’ toirt taic do choimhearsnachdan agus a’ dìon nàdair.” Chan fheum thu a bhith air a bhith an sàs ann an rud sam bith den leithid riamh roimhe airson a dhol an sàs – tha sinn airson ’s gum bi am pannal a’ nochdadh nan coimhearsnachdan beòthail againn agus mar sin bu toil leinn gun tig daoine air adhart bho raon de dhiofar chùl-raointean.”

Togaidh a’ mhaoin air prìomh chuspairean prògram a’ Mhonaidh Ruaidh 2030, le taic bho Mhaoin Dualchais a’ Chrannchuir Nàiseanta, a tha ag amas air:

• Cumhachd a thoirt do coimhearsnachdan gus àm ri teachd na sgìre aca a chumadh
• Cruth-atharrachadh a thoirt air an dòigh sa bheil fearann air riaghladh agus a chleachdadh airson maith nàdair
• Siubhal ann an sgìre a’ Mhonaidh Ruaidh a dhèanamh nas fhasa, nas sàbhailte agus nas uaine
• Coimhearsnachdan nas fhallaine, nas toilichte le sunnd aig an cridhe

Thuirt David Clyne, Ceannard a’ Mhonaidh Ruaidh 2030 aig Ùghdarras Pàirc Nàiseanta a’ Mhonaidh Ruaidh: “Tha e cho brosnachail bliadhna ùr a thòiseachadh le fear de na pròiseactan as àrd-amasaiche ann am prògram Monaidh Ruaidh 2030. Tha ballrachd sa phannal a’ toirt seachad cothrom airson a bhith a’ cumadh mar a bhios an t-suim airgid nach beag seo a’ toirt taic dhan choimhearsnachd againn gus lèirsinn agus cuspairean Monadh Ruaidh 2030 a lìbhrigeadh. Tha fàilte ron a h-uile duine tagradh a dhèanamh gus a bhith an sàs ann an rudeigin a bheir buaidh chruth-atharrachail air coimhearsnachdan. Tha mi a’ dèanamh fiughair ri molaidhean a’ phannail fhaicinn." 

Thuirt Caroline Clark, Stiùiriche na h-Alba aig Maoin-dualchais a’ Chrannchuir Nàiseanta cuideachd: “Tha Maoin nan Coimhearsnachdan aig Monaidh Ruaidh 2030 agus an dòigh sa bheil e ga dhealbhadh agus ga stiùireadh le muinntir an àite na fhìor ghealltanas a bhith a’ cur a’ chumhachd gus atharrachadh a dhèanamh ann an làmhan an fheadhainn a tha a’ fuireach agus ag obair ann am Pàirc Nàiseanta a’ Mhonaidh Ruaidh.”

“Tha e a’ co-thaobhadh gu dìreach ri amasan Maoin Dualchais a’ Chrannchuir Nàiseanta – tasgadh a dhèanamh ann an daoine agus àiteachan gus an urrainn do choimhearsnachdan cumadh a thoirt air an àm ri teachd aca fhèin agus na cruthan-tìre agus an dualchas a tha cudromach dhaibh a dhìon.”

Tha tagraidhean airson ballrachd sa phannal fosgailte eadar an latha an-diugh (Diciadain 7 Faoilleach) agus Didòmhnaich 22 Gearran. Thathar a’ brosnachadh duine sam bith a tha a’ fuireach no ag obair ann am Pàirc Nàiseanta a’ Mhonaidh Ruaidh agus a tha airson pàirt a ghabhail ann a bhith a’ cumadh àm ri teachd nan coimhearsnachd aca tagradh a dhèanamh air-loidhne air an duilleig shònraichte seo air làrach-lìn Ùghdarras Pàirc Nàiseanta a’ Mhonaidh Ruaidh.