Tha còig pròiseactan gus cuid de na gnèithean agus na h-àrainnean as luachmhoire ann am Pàirc Nàiseanta a’ Mhonaidh Ruaidh a dhìon gu bhith a’ faighinn tabhartas de £1.2 millean eatarra bho Mhaoin Ath-bheothachadh Nàdair Riaghaltas na h-Alba.

Dh’ainmich Rùnaire a’ Chaibineit airson Gnìomhachd na Gnàth-shìde agus Cumhachd, Gillian Mhàrtainn BPA, seo agus i air turas gu Coille Àthanagaich ann am Baile nan Granndach an t-seachdain seo far an do choinnich i ris an sgioba a bha an sàs ann am pròiseact gus àireamh seanganan a’ chinn-chaoil àrdachadh. Tha seangan a’ chinn-chaoil air aon de na seangan as teirce san RA, agus tha iad gam meas mar innleadairean eag-shiostam agus tha na neadan aca a’ toirt dachaigh do neo-dhruim-altachain nach lorgar ann an àite sam bith eile san eag-shiostam. 

Thuirt a’ Bh-uas Mhàrtainn: “Tha ròl ro-chudromach aig na pàircean nàiseanta againn ann a bhith a’ lìbhrigeadh ar miann àrd-amasach gus bith-iomadachd ath-bheothachadh ro 2045 agus tha am maoineachadh seo na cheum cudromach a dh’ionnsaigh sin.” Bidh e comasach pròiseactan sònraichte is ùr-ghnàthach a thoirt air adhart leis an airgead seo gus cuid de na gnèithean sa chunnart as motha a dhèanamh tèarainte san àm ri teachd, leithid am pròiseact briodachaidh airson seangan a’ chinn-chaoil – a tha a’ cleachdadh dhòighean nach deach fheuchainn riamh roimhe. 

“Tha an duais seo na pàirt den Mhaoin Ath-bheothachadh Nàdair againn, a’ mhaoin nàdair as motha ann an Alba, a tha air a bhith aig cridhe phròiseactan glèidhteachais air feadh na h-Alba fad nan ceithir bliadhna a dh’fhalbh, ag ath-bheothachadh àrainnean agus a’ toirt piseach air àireamhan fiadh-bheatha.” 

Chuir Sandy Bremner, cathraiche Bòrd Ùghdarras Pàirc Nàiseanta a’ Mhonaidh Ruaidhfàilte air an naidheachd mun mhaoineachadh: “Le 25 sa cheud de na gnèithean anns a’ chunnart as motha san RA a’ fuireach sa Phàirc Nàiseanta, ’s e seo fear de na h-àiteachan as cudromaiche airson glèidhteachas nàdair. Tha a bhith a’ toirt dìon do agus toirt piseach air na h-àrainnean agus nan gnèithean sònraichte seo – a bharrachd air a bhith a’ cur an aghaidh atharrachadh na Gnàth-shìde– aig cridhe Plana Com-pàirteachais Pàirc Nàiseanta a’ Mhonaidh Ruaidh, agus cuidichidh am maoineachadh a bharrachd seo gus dèanamh cinnteach gu bheil an obair glèidhteachais againn air a cuimseachadh far a bheil am feum as motha oirre, a’ neartachadh ar n-oidhirpean agus a’ cuideachadh le bhith a’ lìbhrigeadh phrìomh ghnìomhan air an talamh.” 

Bheir an tabhartas bhon Mhaoin Ath-nuadhachadh Nàdair taic cuideachd do dhiofar stiùirichean talmhainn gus eileamaidean de Phlana Èiginn nan Capall-coille a lìbhrigeadh, a’ gabhail a-steach ionaltradh chruidh agus robo-gheàrradh ann an sgìrean far a bheil an capall-coille gus piseach a thoirt air an àrainn do na h-eòin. Nuair a bhios an crodh a’ coiseachd mun cuairt agus ag ionaltradh, bidh iad a’ saltairt air an talamh, a’ cruthachadh àrainn a tha freagarrach dhan chapall-coille le claisean eabarach a tha math do na neo-dhruim-altachain agus do na lusan a dh’itheas capaill-choille agus an iseanan   

Am measg nam pròiseactan a gheibh buannachd tha obair ath-nuadhachaidh àrainn gus piseach a thoirt air àrainnean far a bheil feusgan neamhnaid fìor-uisge, ro-innleachd ath-bheothachaidh sgìre-uisge Abhainn Dhè, agus a bhith a’ toirt piseach air stoc chraobhan airson craobhan crithinn agus gnèithean dùthchasach beinne.